Татвар төлөгч та харьяалагдах татварын албанаас нэвтрэх нууц үгийг авна. Татварын албанаас өгсөн нэвтрэх үгийг солих шаардлагатай бөгөөд нэвтрэх үгийн нууцлалыг татвар төлөгч өөрөө хариуцна.

Нэвтрэх үгийг оруулсны дараа “Электрон тайлан”-гийн цонх руу шилжин “Цахим тайлан” цэсийг сонгоно. “Цахим тайлан” цэсэнд дараахь жагсаалт гарахад та тайлагнах татварын төрлийг сонгоно. Үүнд:
- “Аж ахуйн нэгжийн орлогын албан татварын тайлан”-г оруулах /Маягт ТТ-02/ /Тухайн төрлийн татвар төлөгч бол/
o “Суутгагчийн аж ахуйн нэгжид олгосон орлогоос суутгасан татварын тайлан”-г оруулах /Маягт ТТ-13/ /Тухайн төрлийн татвар төлөгч бол/
- “Нэмэгдсэн өртгийн албан татварын тайлан”-г оруулах /Маягт ТТ-03/ /Тухайн төрлийн татвар төлөгч бол/
o “Нэмэгдсэн өртгийн албан татварын падаан”-ыг оруулах /Маягт ТМ-02/ /Тухайн төрлийн татвар төлөгч бол/
- “Цалин, хөдөлмөрийн хөлс, тэдгээртэй адилтгах орлого болон шууд бус орлогоос суутгасан албан татварын тайлан”-г оруулах /Маягт ТТ-11/ /Тухайн төрлийн татвар төлөгч бол/
o “Гэрээгээр олгосон хөдөлмөрийн хөлс, шагнал, урамшуулал, тэдгээртэй адилтгах орлогоос суутган тооцсон татварын мэдээ”-г оруулах /Маягт ТТ-11(2)/ /Тухайн төрлийн татвар төлөгч бол/

Сонгосон татварын тайланг үзүүлэлтийн дагуу бүрэн бөглөсний дараа “хадгалах” товчийг дарна. Энэ нь таны бөглөсөн тайлан “Цахим тайлангийн систем”-д хадгалагдлаа гэсэн үг юм.

Энэ үйлдлийн дараа “Электрон тайлан”-гийн цонх руу шилжиж “Тайлангийн жагсаалт” цэсийг сонгоно. Жагсаалтад татвар төлөгч таны шивсэн, татварын албанд илгээхэд бэлэн болсон тайлангийн маягт гарах ба түүнийг дахин сайн нягталсны үндсэн дээр “илгээх” товчийг дарахад таны илгээсэн татварын тайлан харьяалагдах татварын албаны мэдээллийн системд шууд хадгалагдана. Хэрэв та “илгээх” үйлдлийг хийхээс өмнө татварын тайланг буруу шивсэн байвал “устгах” товчийг ажиллуулна. Ингэснээр таны шивсэн татварын тайлан устгагдаж та татварын тайлангаа дахин шивэх боломжтой болно. Иймээс илгээхийн өмнө татварын тайланг сайн нягталж “илгээх” товчийг ажиллуулахыг анхаарна уу.

Татвар төлөгч Та татварын татварын тайланг буруу шивж илгээсэн тохиолдолд зөвхөн ҮТЕГ-ын Мэдээлэл боловсруулалт автоматжуулалтын хэлтэст өөрийн биеэр хүрэлцэн ирж холбогдох маягтыг бөглөсний дараа илгээсэн татварын тайланг устгуулах боломжтой болно. Та ирэхдээ татвар төлөгчийн нэр, татвар төлөгчийн дугаар, илгээсэн татварын тайлангийн төрөл, тайлангийн хугацаа болон залруулах шалтгааны тухай мэдээллийг бэлтгэж ирэх нь зүйтэй юм.